باسم
مرة كان فيه ولد صغير اسمه باسم _ كان قاعد في بيت أبيض كبير فيه ولاد كتير ميعرفهمش _ البيت دة كانت حيطانه كلها فاتحة ومعظمها ابيض وفيه لعب كتير _ كمان الناس اللي فيه لابسين ابيض ومش بيتكلموا كتير والولاد والبنات الصغيرين كتير منهم من غير شعر
هو مرة سألته المس اللي كانت بتاخدهم تلعب معاهم اسمك اية فقال لها باسم قالتله شاطر تعرف يعني اية باسم قال لها معرفش قالت له يعني مبسوط وفرحان عشان كدة وشه بيضحك
باسم لما رجع اوضته بص لوشه في المراية الصغيرة اللي جنب السرير لقي نفسه مش بيضحك
هو بقاله كتير بيبص لوشه يلاقيه كدة معنى كدة انه بقاله كتير مش بيضحك _ وماما وبابا كمان لما بييجوا يلعبوا معاه وشهم مش بيضحك
اشمعنى المس بتضحك والناس اللي لابسين أبيض بيضحكوا واللعب بتضحك والبنات والولاد في التليفزيون بيضحكوا
افتكر باسم التليفزيون _ اصل كان مرة جه ناس كتير شايلين حاجات وجابوله حاجات حلوة وقالتله المس دول من التليفزيون _ وقالتله يحفظ الجملتين دول ويقول لهم وهو بيضحك اول ما الراجل اللي قاعد على الكرسي يشاورله _ وانه لو عمل كدة يبقى شاطر وحتجيب له حاجات حلوة اكتر
باسم عشان شاطر حفظ الكلام كله وقاله كذا مرة صح بس الراجل كان بيقف كل مرة ويقوله يضحك
باسم قاله مش بعرف ودي اول مرة يعرف باسم ان الضحك حاجة صعبة ومش اي حد يعرف يضحك
وفي يوم كدة جات المس وقالتله جات زيارة من الجامعة قالها يعني اية قالتله يعني ناس حلوين زيكم جايين عشان يلعبوا معاكم ويجيبولكوا حاجات حلوة ولعب ويحكولكوا حواديت
باسم مفهمش قوي طيب لية هما بيعملوا كدة بس كان مبسوط ومستغرب
ويومها جات بنت حلوة قوي ولابسة جيبة زرقا واسعة زي البحر وبلوزة بيضا ناعمة زي الورد وطرحة بيضا صافية زي السما _ البنت دي كانت بتضحك على طول عشان كدة سالها انتي اسمك اية _قالتله منى قال لها لية مش اسمك باسم _ ضحكت قوي وقالتله لية يبقى اسمي باسم قال لها عشان بتضحكي على طول
ضحكت اكتر فقال لها وانا ازاي اسمي باسم وانا مش بضحك
قالتله لية مش بتضحك قال لها مش بعرف فقالتله تعرف احنا بنعمل اية في الجامعة قالها اية قالتله احنا بنتعلم حاجات مكناش بنعرف نعملها
قال لها يعني انتي هناك اتعلمتي تضحكي طب ممكن تعلميني قالتله طيب بس توعدني تذاكر وتبقى شاطر راح جابلها كراساته وقال لها انا على طول شاطر بصي واخد كام نجمة قالتله طيب هات كراسة جديدة فاول ماجابها خدتها منه وكتبت عليها كراسة الضحك واسمه ورسمت وشوش كتير بتضحك قوي لدرجة ان عينيها مغمضين
قالتله اكتب ورايا : اول درس _ مفيش حد ميعرفش يضحك _ دي حاجة ربنا بيعلمهالنا من غير مانطلبها زي النظر كدة _ قال لها لية _ قالتله عشان ربنا بس اللي عارف قد اية مهمة _ هات بقى الكراسة
بص الولد للكراسة وبعدين لمنى وهو محتار فاداها الكراسة فلقاها بتقطع الورقة اللي فيها الدرس وبتتني فيها بطريقة عجيبة لحد مابقت مركبة فابتسم شوية بعدين لقي المركبة بقت مربع صغير مرسوم عليه وش بيضحك قوي _ مسكت منى الوش وحركته كإنه بيتكلم وقالتله انا اسمي باسم انت اسمك اية _ باسم ضحك قوي قوي
قالتله شفت انت بتضحك حلو ازاي قال لها عشان انتي عندك لعب حلوة وانا مش عندي
قالت له طيب اكتب ورايا الدرس التاني
مسك الكراسة فقالتله مفيش حاجة مينفعش يتلعب بيها _ اللعب زي الضحك بس بالايدين مش بالبؤ
قال لها مش فاهم
فاخدت الكراسة وبرضه قطعت الصفحة حتت نونو قوي لحد مابقت كل حتة على شكل نجمة
قالتله غمض عينك فعمض راحت رمت النجوم في الهوا فوقعت عليهم واول ماباسم حس بالنجوم وهي بتزغزغه ضحك أكتر أكتر
قعد باسم مع منى ساعتين كاملين يلعبوا ويحكوا حواديت ويضحكوا كتير كتير
بعدين وهي مروحة عمل لها باي باي وقعد باصص لها لحد مابعدت وكان ماسك ايد المس فبصلها وقال لها تعرفي أنا اتعلمت النهاردة حاجات من اللي بيتعلموها في الجامعة فقالتله بجد طيب حنقعد كلنا بكرة الصبح زي ماتعودنا وتقولنا اتعلمت اية
باسم جري على سريره عشان ينام والصبح ييجي بسرعة وبص على المراية اللي منى كانت لزقت عليها نجوم ومراكب ملونة _ بص باسم فلقي مكان وشه وش بيضحك قوي لدرجة ان عينيه كانوا مغمضين
