التوهة في ألوان عينيكي

طاير ورا شعور البنات حلمي الخفيف
أوراق شجر خضرا
بتحلم
باحتضان البنت للضحكة ولإيدين الولد
علشان تقرب
تكتمل
تصبح شجر
طاير ورا شعور البنات

....................................

كلها أيام وترجعلي عيوني
لما تردي على صباح الخير
اللي نسيتيها في ضي الصبح مطفية
من غير صباح النور
وسيبتيني غنا أخرس
محتاج نفس عصفور

كلها أيام ويرجع صوتي لما أندهك
لحظة ما أشوفك وانتي نايمة بتهمسي اسمي
أو وانتي بتجيبي في سيرتي ويا لون النيل
وبتقطفي أسراري من فوق الشجر
ومن حكاوي الصيادين المخمورين بالتوهة في ألوان عينيكي

كلها أيام وترجعلي قصيدتي
لما أقول قدامك إني عرفت سرك اللي كنتي مخبياه :
نفسك في نجمة تعلقي روحك عليها
وتسيبيها في الهوا

....................................

سري أنا ؟؟
نفسي أكون ساعي بريد مهمل
وأغير العناوين على الجوابات
الفرحة على عنوان عينيكي
والألم في جيوبي أخبيه م السعاة
وأكتب على ضهر الجواب
لم يستدل على حبيبي يا ألم
ابعد خلاص

نفسي أكون شباك في أوضتك ع الطريق
يستجوب الشمس اللي داخلة والهوا
والملايكة اللي بتفرش لك سريرك
أو بتغزل حلم دافي عشان تنامي
وقبل ما تمشي بتغمزلي وتؤمر :
" خلي بلك منها "
شباك في أوضتك سايب العصافير وبيدوب عينيه في كلام إيديكي مع الورق
وانتي بتدي ضهر لوحتك ليا
لحسن أعرف
انتي راسمة مين
شباك في أوضتك قبل ما تنامي تداريني ورا ستارة
لحسن أشوفك وانتي نايمة بتهمسي اسمي

نفسي أكون لك أي حاجة فيها صوتك
أصل أنا من يوم ماغبتي غنوتي زرقا
وحيدة
زي ندهة بياعين غزل البنات
في شوارع كلها عواجيز
وزي نيل مفهوش شجر طاير ورا شعور البنات
ولا صيادين عارفين حكاوي عننا
أو مخمورين بالتوهة في ألوان عينيكي..