طرحة بيضا ريحتها ياسمين - عرض رسوم متحركة

لقطة 1
وش مبتسم على يمين الشاشة
وش مبتسم على شمال الشاشة يبدأ في الاقتراب من الوش الأول

يلزقوا في بعض جامد لحد مايبقى كل الفاصل بينهم خط مستقيم

الوش اللي على الشمال يطلع من جيبه استيكة صغيرة ويمسح الخط الفاصل
يتحولوا لوش واحد بيضحك ضحكتين جنب بعض
الضحكتين يندمجوا في ضحكة كبيرة واسعة طالعة برة حدود الوش
والعنين الزيادة يتحولوا دموع فرح
ماينزلوش طبعا
- دموع الفرح مابتنزلش
بتتخزن جوانا
عشان تتعمل منها بعدين حمرة الخجل -

الوش دلوقتي بيبص حواليه مش لاقي حد
الكادر يوسع عشان يظهر للوش دة صدر وبطن وايدين ورجلين
يبص الولد دة على حاجة بتتحرك في صدره
يلاقي وش جميل قوي في نص صدره بينبض بانتظام
وبيبص له بابتسامة
شبه ابتسامته بتاعة زمان


لقطة 2
كنبة صغيرة وسط صالة
بنت لابسة طرحة بيضا تفتح الباب الخارجي وتدخل
تقلع جزمنها وتقعد وتربع رجليها
الشباك يتفتح من الهوا تقوم عشان تقفله
تبص للبحر من بعيد
الموج شكله متغير
صفوف ورا صفوف من الوشوش المبتسمة جنب بعضها
وفيه شوية منهم بيتوشوشوا ويضحكوا مرة واحدة بصوت عالي
فيعملوا زبد أبيض
البنت تنزل جري من غير ما تلبس الجزمة


لقطة 3

البنت واقفة بحيرة تبص على الوشوش الكتير اللي في الموج
كلهم ضحكتهم حلوة
وكلهم بيبصولها
حتعرف منين
فيه واحد منهم بس هو اللي حيقولها :
ايدك ناعمة بتلمس الرمل من غير ماتجرحه
وضحكتك واسعة ومليانة هوا مابيخلصش
وغيابك غويط وضلمة ولونه أزرق غامق ومليان كائنات مخيفة
واحد منهم بس
لو شاورت لأي حد غيره حيطلع عشان يحكيلها عن عربيته وصورته على الفيس
وبعدين حتشم ريحة جل
وهي مش بتحب ريحة الجل
واحد منهم بس
انما حتعرفه ازاي

لقطة 4

موقف أتوبيس
ناس كتير بيجروا على اتوبيس جاي من بعيد
الاربع عجلات شكلهم متغير
اربع وشوش مكشرة خشنة
البنت تخاف وترجع لورا
اتوبيسات كتير ييجوا عجلاتهم كلهم ليهم نفس الشكل
ناس تركب وتمشي وناس جديدة تيجي وتقف
البنت تبص للأرض وبعدين ترجع مشي لنفس الحتة اللي كانت واقفة فيها على البحر

لقطة 5

البنت مربعة رجليها على كنبة الصالة بتكتب جواب :
أكيد حتعرف خطي
بتحط الجواب في قزازة وبعدين تتسحب للشط بالليل
الموج شكله متغير
صفوف ورا صفوف من الوشوش النايمة جنب بعضها
ترمي القزازة بعييييييييييييد



لقطة 6

الشط في وقت الضهر
البنت بتبص للقزازة بإحباط
وهي مركونة على الشط
فاضية
وهي بتلف عشان تروح الطرحة البيضا بتاعتها تطير
الوشوش المبتسمة الكتير كلها تبص لفوق
الطرحة تغير اتجاهها فجأة وتنزل على وش واقف بعيد في موجة هادية


لقطة 7

كنبة صغيرة وسط صالة
البنت والوش اللي كان وسط الموجة الهادية قاعدين بيضحكوا
الولد دة بيطلع حاجة من جيبه :
أكيد حتعرف خطي
يتكلم لأول مرة :
بس كان لازم أتأكد
الطرحة البيضا كان ريحتها ياسمين
البنت تحط راسها على كتفه
والولد من غير ماتاخد بالها بيبص للوش اللي بينبض في قلبه يلاقيه شبهها قوي