يلعن أبو كل اللي حاسين بالأمان

معاده كام القطر دة
ياشيخ عماد
فاتني معاد ووراه معاد
وكل مرة أجرى بتكعبل في ضلي
ينجرح كعبي وينزل زفت إسود
أقول خلاص :
بكرة من اليوم مش بعيد
وبكرة يبعد



فاتني أدان ووراه أدان
ياشيخ عماد
والميا متحاشة وكل ترابنا متنجس بخطاوينا
قول لي على مطرح عشان أتوضى يمكن ألحقك
دانا جريت
والله ياما جريت ورا السماوات
اللي شاورتلي في عيونك
وانت مادد لي من الشباك
دراعك الأبيض كما قلب الغريب
أبيض كما ورد الفساتين
كراسات الرسم
طعم الضحك
شوق الغلبانين لرخام رسول الحق
وجع المسك في دم الولاد
إلا قول لي
ريحته إية المسك دة
ياشيخ عماد
وجعاني أيامي
وواجعني دراعك الأبيض الشفاف كما شمس الضحى
وانت بتطبطب على دموعي وتقرا :
" جاء من أقصى المدينة "
خبيني منك يا إمام
ومن دراعك لحسن ألمح صورتي فيه
أو اشوف محمد نفسه يعرف : لية جرينا
هو انا علمتكم : إن العمى ينفع ملابس داخلية لضعفكم ؟
علمتكم : إن السما العريانة أشرف م البنات المقتولين
مع كل لقطة معادة في عنيكوا الجبانة ؟
وإن كتم الحق حكمة مش خيانة ؟



خبيني من عين النبي
ياشيخ عماد
يا آخر اللبس الجديد
وآخر الأعياد
يا آخر الناس اللي حنصلي وراهم
مش شاغلنا غير دموعنا
والدعاء وقت السجود
يا آخر الجدران من ريحة الجدود
وآخر قزازة مسك فاتها لنا الإله
علشان نصونها لجل لحظة زي دي
لما الكلاب تنقض وضوءنا
أو منافق يملا كرشه من شرفنا
ويناقشنا في " الحدود "



يا شيخ عماد
تقلت هدومنا فوق كتافنا
لما دبنا في عناوين الجرايد
صبحت مفاصلنا سجاير فرط
ما بين العساكر والمشايخ واللي راكبين ع اليفط
غصبونا عسكر بعد عسكر بعد عسكر
يا إلهي – تقولش فاكريننا قطط
حرمونا حتى حقنا في الاغتسال من ريح جلودهم
حرمونا حتى حقنا في جنين نضيف
له أب معلوم النسب
غصبونا عسكر بعد عسكر بعد عسكر
والنجس له ألف أب
وسبتنا ياشيخ عماد
مين اللي راح يكتب كتابنا ع النهار
ونقول وراه
على مذهب أبي حنيفة
مين اللي حياخدنا لقبلتنا الشريفة
مين اللي حيصحينا من تقل الهدوم
علشان نصلى الفجر حاضر
يمكن النور من عيونه يعود لأيامنا الكفيفة



يا شيخ عماد
سامح لساني
يلعن أبوهم كلهم
يلعن أبو كل اللي نام عن يوم عزاك
وساب جنازتك للتلامذة والحمام والشمس
نيابة عنا
يستسمحوا المولى بما لا نفقهه
يلعن أبو كل اللي عامل نفسه مش شايف
مع إن دمك لسة بيشاور على القاتل : أهو
يلعن أبو كل الدقون العيرة
واليفط الكبيرة
واللي بيخزن قزايز البيرة قبل ما يمنعوها
يلعن أبو كل اللي ما شاف أمه في اللي قلعوها
يلعن أبو كل التفاسير والدوافع
والمجاهيل والأصابع
والجزم برة الجوامع
والجنانين والشوارع والغيطان
يلعن أبو كل اللي حاسين بالأمان